港鐵大圍站上蓋圍方7.22試業 滙聚近150商戶

港鐵旗下嘅港鐵大圍站上蓋嶄新大型社區地標圍方（The Wai），將於今年7月22日試業，黛安聽聞，圍方將設4層商舖樓層，總樓面面積約65萬呎，滙聚近150個商戶，為大眾提供與別不同嘅精采體驗。

港鐵公司物業及國際業務總監鄧智輝先生同黛安講，圍方位於港鐵大圍站上蓋，係重點嘅鐵路樞紐，擁有屯馬綫及東鐵綫雙綫滙聚優勢，連接全港各區。圍方與車站無縫連接，充分體現港鐵秉持嘅「鐵路加社區」發展概念，以鐵路為骨幹建設社區，為周邊社區增設包括學校、社區中心、休憩空間等設施，照顧到區內居民衣、食、住、行等日常需要。

黛安知道，圍方有多個出入口及新建行人天橋，商場地理位置優越，亦連接新界東西嘅單車徑網絡，仲有全港最大、佔地約13,000呎嘅室內單車停車場，提供330個單車泊位及一系列單車友善配套設施，真係好方便。