Suage北海道湯咖喱進駐朗豪坊 會員優惠生日全單8折

北海道No.1、曾獲獎嘅「Suage北海道湯咖喱」最近登陸香港，新店選址旺角朗豪坊，為食客提供舒適寬敞嘅用餐環境。黛安知道，佢哋位於札幌嘅總店自2007年開幕以來備受好評，被譽為「北海道第一湯咖喱」。香港店將提供團隊挑選嘅優質肉類、時令蔬菜及海鮮等10種主食、自選3款湯底及99級辣度，再配搭香港推介嘅稻庭烏冬，為大家帶嚟視覺及味覺嘅雙重滋味。

當中星級推介包括香港店獨有嘅「龍蝦海鮮盛湯咖喱」、選用日本錦爽雞而製嘅「脆皮雞腿肉串湯咖喱」，仲有日本大熱嘅「炙燒豚角煮湯咖喱」等等，辣度方面亦有BB辣、微辣至無語辣等多種級數畀食客挑戰，另設有無辣度嘅兒童湯咖喱，照顧唔同人嘅口味。

新店開幕期間更推出會員優惠，即日起會員可享迎新禮品，任何惠顧即免費送1款飲品或小食，及獲贈「全單減$5」電子優惠券乙張；壽星更可享全單8折生日優惠等。