「香港人真係變得好冷漠！」這是一位暖男游水教練的深切體會，昨日他在粉嶺遇到一位疑患腦退化症伯伯，因失禁滿褲糞便，惟商場保安未施予援手，反怒喝：「再行入嚟我報警！」附近途人非就手旁觀，便是拍下伯伯尷尬情況「打卡」，只有事主上前協助，為伯伯送上新褲、尋覓廁所，事後大嘆港人冷漠。
老翁圖入商場借廁所 保安恐嚇「再行入嚟我報警」
曾任醫療輔助隊、現職游水教練的黃先生於Facebook發文，指昨晚（27日）游水後途經粉嶺一商場遇到一名伯伯，其褲子半脫且沾滿糞便，似是打算進入商場借廁所，卻遭保安阻止，更被出言恐嚇：「再行入嚟我報警」。期間雖不斷有途人行經，惟無人出手相助，「個個鄙視眼光大叫好臭，忌而遠之，有個男人行過仲幫佢影相打卡」。
黃教練形容，該名64歲的伯伯頸上掛著證件，不懂說話、不會望人、指甲吋半長，疑患上嚴重腦退化症，形容正是官員所指「有工作能力、唔應該接受福利嘅64歲年青人」。
暖男教練幫老伯買新衫 怒叱途人「仲要影相打咭擺上網」
雖然其後有人主動上前幫忙，保安卻以「攪得掂」為由一口拒絕，「繼續阻止佢入嚟等佢自生自滅」。黃教練見狀決定向區議員及警方求助，在等候救護車期間，更好心用自己的毛巾為老伯遮蔽下身，甚至奔跑於2個商場，為老伯買下一條99元的新褲替換。最終救護車在10多分鐘後到達將老伯接走，警員則在議員報警後50分鐘到場。
黃教練稱，事件中他的損失只是一條85元吸水毛巾、99元新褲，以及1小時時間，卻成功幫忙徬徨無助的伯伯，難以理解為何香港人如此冷漠，拒絕不施予援手：「伯伯嘢又唔識講，最徬徨之際，唔單只無人幫佢，仲要俾人影相打咭擺上網？！見到人有需要幫到就幫，走頭無路完全無助好慘架！」
帖文全文如下：
香港人真係變得好冷漠!😟點解見到有需要既人唔單止冇人幫佢，仲要阻止人幫佢等佢自生自滅？ 希望各位可以睇晒佢，係個好好既經歷....
話說頭先係粉嶺泳池教完水，行過粉嶺XX（商場），見到有個伯伯除咗半條褲，成褲都係屎，伯伯好徬徨咁想行入商場，相信想搵廁所，但俾保安阻止，仲恐嚇佢:
「再行入嚟我報警架？！😡」
伯伯身上掛住身分證，不過完全唔識講嘢，但識回應，不過唔識望人，可能有嚴重老人痴呆或自閉症。有掛證証明佢係有人跟進，佢有著紙尿片，但身上衫褲都好污糟，指甲有吋半長，可能係獨居老人，每日有人送飯沖涼，但冇宿位俾佢。
跟住行過既行人個個鄙視眼光大叫好臭，忌而遠之，有個男人行過仲幫佢影相打卡添！
我即時call當區議員附近有冇外展老人服務，議助話call警察，剛巧有民政署同事放工行過，主動問保安需唔需要幫手，保安拒絕，話佢攪得掂，即係繼續阻止佢入嚟等佢自生自滅。
結果我叫伯伯等多陣，好快有人幫手，點知等咗二十五分鐘完全冇聲氣，再打俾議辦話已經call阿sir嚟幫手，我見唔對路，想搵條褲俾伯伯著住先，但又怕我行開後伯伯走咗去，咁打俾 Benson Tsang 問下意見，佢叫我再call白車，我俾伯伯坐底，搵自己條毛巾遮住伯伯，叫商場保安幫手睇住伯伯唔好俾佢走開，我去搵條褲俾佢，保安反問
「去邊搵?」
「 買囉!!」
再跑去商場買條褲俾伯伯，但商場得baleno有男人褲賣，仲要299兩條，冇一條賣，我跑到去粉嶺XX（商場）間時裝店，一樣價，我同佢講情況，店員即刻摷全間舖搵條褲俾我，搵到條次貨99蚊，除咗佢條褲，等白車嚟時可以有褲換，15分鐘後白車嚟咗，救護嚟交待伯伯生命表徵就離去，走個時約議員報警50分鐘後，警察終於到場，跟住我就冇眼睇啦。
我返去商場再同保安講，伯伯已經有人車去醫院，你可以收工啦，佢話我好好人，仲話
「個伯伯再入嚟我要報警」
「你一早就應該報警CALL白車幫佢啦!! 」
結果我今日損失既只係一條85蚊既索水毛巾、99蚊買咗條褲，同一個鐘時間。但伯伯嘢又唔識講，最徬徨之際，唔單只冇人幫佢，仲要俾人影相打咭擺上網?! 如果有人發現有邊個影咗個無褲著既伯伯上網唔該摷佢出嚟，呢個根本係人渣仲既XX，唔幫手不特止仲要幫手欺淩佢？！
原來佢仲未夠65歲，佢正係果個某黨當智囊既膠官羅致光話仲好年青好有工作能力唔應該接受福利既64歲年青人!! 睇佢個樣以為已經80歲! 恕我唔登伯伯個樣出嚟，只係影救護員算啦，希望邊個見到有人放伯伯除褲相出嚟既好好料理下佢。仲有見到人有需要幫到就幫，走頭無路完全無助好慘架！！😟
PS. 好多人PM我嚟對証係咪失蹤親屬，伯伯姓曾，如果年齡同姓氏都吻合既，可以再問我或去北區醫院查詢啦，亦希望各位可以快D搵返你地失蹤既親屬
Ps. 今早陳旭明（議員）致電，話已經聯絡咗社署，亦都搵到阿叔嘅屋企地址，佢有社工跟開 ，不過情況惡化得好快，同社工夾下點幫佢