【醫護辛酸】再有救護員斥市民濫用服務 反被質疑捱不到應主動辭職 「麻煩畀啲尊重」

本港新冠肺炎疫情嚴峻，連日新增近100宗確診個案，令醫護人員的壓力百上加斤。繼早前有救護員發文呻有市民濫用救護車服務後，再有其他救護員怒斥有市民因小傷小病而召喚緊急服務，加重救護員負擔，再加上資源及人手不足，幾乎每日都要超時工作，一時的抱怨卻反被質疑捱不到應主動辭職，逐呼籲市民：「麻煩畀啲尊重」。

有自稱是救護員的網民投稿至Facebook專頁「公務員secrets」，指救護員工作量龐大，但即使有怨言亦會繼續落力工作。至於早前因有救護員抱怨工作壓力大，而引起部分人、甚至同行質疑應主動辭職，事主回應：

「我係嫌辛苦呀咁點吖？你成世人未嫌過辛苦呀？救護員最叻係咩呀？X完老母咪又係落手落腳做，有冇聽過有人濫叫車畀救護員趕落車吖？冇吖嘛。」

市民濫用、拒合作延誤救援

事主指出，不少人濫用救護服務，但現時救護員人手不足，導致部分病情嚴重的市民無法得到及時治療，

「真正有需要嘅人就係因為成區啲車，畀啲無無謂謂頭痛腳痛跌親撞親切親嘅垃圾call霸住晒，要叫隔離甚至隔隔離區嘅車嚟做緊急case。」

他又透露工作期間，不時會遇到不讓路，甚至霸佔消防通道的駕駛者，進入住宅期間又要先接受大廈保安「問長問短」，導致延遲救援。

不過，事主同時又稱讚有部分年輕人不會將救護車叫作「白車」，又有更多禮貌的長者會出言答謝，亦有市民會主動禮讓救護員優先乘坐電梯；甚至有病人登上救急車前會先戴上手套和面罩，保障眾人安全。他呼籲市民如稍有不適，應乘搭的士前往醫院，免得浪費資源：

「搭多啲紅的綠的啦，成日掛住坐白的。記住呀，上車就開車嘅叫的士，上車要檢查嘅叫救護車。要快嘅搭的士啦！」

資源人手不足每日加班

此外，亦有另一名自稱是救護員的網民投稿至該專頁，指即使救護員工作壓力龐大，甚至遇到不公平待遇，但因本著救人的心意，仍然繼續工作，

「上嚟都係呻吓，想大家唔好濫用緊急服務啫。」

事主表示救護員工作量多，但薪金和福利卻比不上其他眾多紀律部隊，每日上班超過12小時，一日內起碼要出動10次，工作期間涉及體力勞動，並不是外人想像般輕鬆。目前資源及人手不足，幾乎每日都要超時工作，

「有無人諗過坐定定半個鐘食lunch都係奢侈，話返12個鐘，多數日日都要ot(超時工作)，你哋有無諗過，要同屋企人一齊食飯都好難?」

對於有人批評救護員怨言過多，質疑應主動辭職，他反問：

「不如倒轉問你，你想唔想做救護，唔做嘅原因係乜? 咁份份工都要有人做㗎喇，麻煩畀啲尊重啦！」

長期受壓感氣餒

事主透露，每日都需要接送確診病人，坦言擔心會連累家人，生日當日亦不敢與母親見面。他表示，資源不足加上濫用救護服務，救護員長期受壓難免感到氣餒，唯有呼籲市民多尊重及珍惜救護服務，並希望上級多體恤前線員工苦況，改善工作環境，

「畀我哋食餐安樂飯30mins(分鐘)夠㗎喇！請假唔使乞咁，我自己ot嘅鐘，想放(補假)都唔係自主到，咁我又可唔可能揀唔ot呀？」

延伸閱讀：

【醫護辛酸】救護員直踩15小時無休息 怒轟市民濫用資源 「救護車唔係免費的士」【查看更多】

新確診者近半未能即日送院 醫管局拆解延誤原因+醫護難處【查看更多】

每朝索取《晴報》：精明生活．健康家庭．開心娛樂

撰文：黎穎芯